Toshkentda talaba Isroil elchixonasini yoqib yubormoqchi bo‘ldi
U Falastindagi kasalxonalar bombardimon qilinganligidan taʼsirlanib, shu ishga qo‘l urgan.
Talaba ijtimoiy tarmoq orqali Isroil tomonidan Falastindagi kasalxonalar bombardimon qilinganligi, oqibatda juda ko‘p musulmonlar va ayniqsa yosh bolalar o‘lganligi haqidagi videoni ko‘rib, undan taʼsirlanib, Isroil davlatiga nisbatan musulmonlar uchun o‘ch olish maqsadida Isroil davlatining O‘zbekistondagi elchixonasiga o‘t qo‘yishni rejalashtirgan.
Sudlanuvchi o‘tgan yilning 19 oktyabr kuni soat 04:30 atrofida o‘ziga tegishli bo‘lgan sport sumkasiga bir dona 0,45 gramm hajmli yonuvchi “kerosin” suyuqligi solingan shisha idish, gantel sport anjomining uch dona ajratilgan toshlari, ikki quti gugurt va mato bo‘laklarini joylab, Isroil davlatining O‘zbekistondagi elchixonasi binosi tomonga borgan. Shundan so‘ng shisha idish va gantel toshini devor ustidan elchixona hovlisi ichiga uloqtirishga erishgan.
Sud hukmiga ko‘ra sudlanuvchi JKning 155-moddasining 1-qismida nazarda tutilgan jinoyatni sodir etishda aybdor deb topildi.
Unga nisbatan JKning 155-moddasi 1-qismi bilan JKning 57-moddasini qo‘llab, 5 yil muddatga ozodlikdan mahrum qilish jazosi tayinlandi.
