TURKSOY hamkorligida “Mulla Nasriddin” filmi yaratiladi
Renessans kino uyida kinoloyiha taqdimoti o‘tkazildi.
Xalqaro turkiy madaniyat tashkiloti – TURKSOY hamkorligida yaratiladigan “Mulla Nasriddin” kinoloyihasining ozarbayjonlik kino vakillari tomonidan taqdimoti bo‘lib o‘tdi.
Uchrashuvda Kinematografiya agentligi rahbariyati, Ozarbayjon Madaniyat vazirligi bo‘lim boshlig‘i Rashad Azizov, ozarbayjonlik prodyuserlar Zaur Darabzoda va Azer Kuliyev, Ozarbayjon xalq artisti Vagif Mustafoyev hamda Agentlik huzuridagi Badiiy kengash aʼzolari ishtirok etdi.
O‘zbekiston, Ozarbayjon, Turkiya, Qozog‘iston, Qirg‘iziston davlatlari kino ijodkorlari tomonidan yaratiladigan badiiy filmning ssenariy muallifi va rejissyori Vagif Mustafoyev. Ushbu filmning salkam yarim soati O‘zbekistonga bag‘ishlanadi. Suratga olish ishlarining asosiy manzillari xususan, Buxoro va Xivada bo‘lib o‘tadi. XVI Toshkent xalqaro kinofestivali doirasida ushbu loyihaning suratga olish ishlariga start berilishi kelishib olindi.
Bundan tashqari, uchrashuvda Ozarbayjon bilan hamkorlikda suratga olinadigan o‘zbek adabiyotining atoqli namoyandalaridan biri, mashhur shoir, dramaturg, adabiyotshunos olim va tarjimon Maqsud Shayxzoda haqidagi kinoloyiha ham muhokama qilindi. Badiiy kengash aʼzolari tomonidan loyiha ijobiy maʼqullandi va ssenariy ustida ish boshlash shuningdek, O‘zbekiston va Ozarbayjondan tomondan ijodiy guruhlar tashkil etish va biriktirish taklifi berildi. Tomonlar kelgusidagi madaniy aloqalarni yuqoridagi kabi loyihalar bilan mustahkamlash o‘rinli ekani taʼkidladi.
