Pulni qaytarish muddati yo‘q, kafolat belgilanmagan: 132 ta quruvchi shartnomasida kamchilik topildi
9 oyda fuqarolardan qurilish sifati va obyektlarning kech topshirilishi yuzasidan 1 700 dan ortiq shikoyat kelib tushgan.
Raqobat qo‘mitasi 2026-yilning dastlabki to‘qqiz oyida qurilish ishlari sifati va turar joy obyektlarining o‘z vaqtida topshirilmasligi yuzasidan iste’molchilardan 1 700 dan ortiq murojaat kelib tushganini ma’lum qildi. Murojaatlarni ko‘rib chiqish natijasida fuqarolar foydasiga qariyb 14,5 mlrd so‘mlik mablag‘ qayta hisob-kitob qilinishi ta’minlangan.
Shuningdek, murojaatlar asosida 12 ta hududdagi 132 ta qurilish tashkilotining turar joy qurilishida ulushli ishtirok etish bo‘yicha shartnomalari tahlil qilindi.
Tahlil natijalariga ko‘ra, shartnomalarning 77,3 foizida shartnoma bekor qilinganda to‘langan mablag‘ni qaytarish muddati belgilanmagan yoki dastlabki to‘lov muddatiga mos kelmagan. 63,6 foizida xonadon qabul qilib olinganidan keyingi kafolat muddati ko‘rsatilmagan.
Bundan tashqari, shartnomalarning 59,1 foizi faqat quruvchi manfaatlarini ko‘zlab tuzilgan. 54,5 foizida kafolat muddati davomida aniqlangan nuqsonlarni bartaraf etish majburiyati nazarda tutilmagan. 50,8 foizida qurilish muddati kechiktirilgan taqdirda quruvchi to‘lashi lozim bo‘lgan penya belgilanmagan.
Shuningdek, shartnomalarning 33,3 foizida qurilish obyektini topshirishning aniq muddati ko‘rsatilmagan, 30,3 foizi esa davlat tilida emas, rus tilida tuzilgan. Shartnomalarning 49,2 foizida iste’molchilar huquqlarini kamsituvchi boshqa shartlar ham aniqlangan.
Qo‘mita ma’lumotiga ko‘ra, ayrim shartnomalarda xaridor tashabbusi bilan shartnoma bekor qilinganda to‘langan mablag‘ning 4–15 foizini ushlab qolish, pulni xonadon qayta sotilganidan keyingina qaytarish, narxni bir tomonlama oshirish va xaridorga nisbatan yuqori miqdorda penya belgilash kabi bandlar mavjud.
O‘rganish yakunlari bo‘yicha aniqlangan kamchiliklar yuzasidan tegishli idoralarga takliflar kiritilgan.
