Buyurtma asosida odam o‘g‘irlash: Toshkentda ikki gumonlanuvchi ushlandi
Ularning telefonidan yana bir fuqaroni elektroshoker yordamida olib qochish rejasiga oid yozishmalar topilgan.
Toshkent shahrida buyurtma asosida odam o‘g‘irlashga urinishda gumonlangan ikki nafar shaxs qo‘lga olindi. Ularning telefonlaridan yana bir fuqaroni majburan olib ketish rejasiga oid yozishmalar ham aniqlangan. Bu haqda Ichki ishlar vazirligi xabar berdi.
Ma’lum qilinishicha, IIV Tezkor-qidiruv departamentiga bir fuqaro murojaat qilib, noma’lum shaxslar uni avtomobilda olib qochganini bildirgan. Uning aytishicha, qat’iy qarshilik ko‘rsatishi natijasida u gumonlanuvchilar qo‘lidan qutulib qolgan.
Mazkur murojaat asosida IIV Tezkor-qidiruv departamenti xodimlari tomonidan tezkor tadbir o‘tkazilib, hodisaga aloqadorlikda gumonlangan ikki kishi qo‘lga olingan. Ular 2003 va 1998-yillarda Toshkent shahrida tug‘ilgan, avval o‘g‘rilik jinoyati uchun sudlangan shaxslar ekani ma’lum qilingan.
Gumonlanuvchilarga tegishli avtomobil yukxonasidan o‘tkir tig‘li bolta topilib, belgilangan tartibda rasmiylashtirilgan.
Vazirlik ma’lumotiga ko‘ra, surishtiruv davomida ushlangan shaxslar ayblovlarni tan olgan. Ularning mobil telefonlari tekshirilganda, buyurtmachi bilan Telegram orqali olib borilgan yozishmalar aniqlangan.
Yozishmalarda gumonlanuvchilarga murojaatchini har qanday yo‘l bilan buyurtmachining oldiga olib borish topshirilgani qayd etilgan. Bundan tashqari, ular yana bir fuqaroni ham majburan olib kelishi kerak bo‘lgan. Buning uchun hatto uning bo‘yniga elektroshoker bilan zarba berib, hushidan ketkazish orqali olib ketish rejalashtirilgani yozishmalarda aks etgan.
Ma’lum qilinishicha, gumonlanuvchilar ikkinchi fuqaroni ishxonasi oldida qariyb to‘rt soat kutgan. Biroq uning xizmat safariga ketganini bilib, rejani boshqa kunga qoldirgan.
Holat yuzasidan Jinoyat kodeksining 137-moddasi 2-qismi “b” va “v” bandlari bilan jinoyat ishi qo‘zg‘atilgan. Hozirda ish doirasida tergov harakatlari olib borilmoqda.
