Toshkentda havo sifati yaxshilandi: “yashil” daraja qayd etildi
Poytaxt havosida PM zarrachalari tarqalishi ortidan havo sifati yaxshilandi.
Toshkentda 6-noyabrga o‘tar kechasi havo sifati yomonlashganidan so‘ng tonggi soatlarda vaziyat yaxshilandi. Milliy havo sifati indeksi bo‘yicha poytaxtda havo sifati “yashil” darajaga yetdi.
Ekologiya qo‘mitasi ma’lumotiga ko‘ra, 5-noyabr kuni soat 20:00 dan boshlab xalqaro havo sifati indeksi (AQI) bo‘yicha Toshkent havosi “nosog‘lom” darajaga tushgan. Yarim tundan keyin esa havo sifati yaxshilanib, tongda “o‘rtacha” darajada qayd etilgan. Milliy indeks bo‘yicha ko‘rsatkich yarim tungacha “sariq”, undan keyin esa “yashil” darajada bo‘lgan.
Qayd etilishicha, kechki soatlarda shamolning sustligi mahalliy va qo‘shni hududlarda hosil bo‘lgan atmosfera tashlamalari hamda PM zarrachalarining tarqalishiga to‘sqinlik qilgan. Natijada ifloslantiruvchi moddalar yer yuzasiga yaqin qatlamda to‘planib qolgan.
Yarim tundan keyin sharqdan iliq va quruq havo kirib kelishi, shamol tezligining oshishi va havo almashinuvi yaxshilanishi natijasida PM zarrachalari tarqalgan.
Ekologik monitoring milliy markazi mutaxassislari Toshkent shahri va Qibray tumanida havo sifati bo‘yicha instrumental o‘lchovlar ham o‘tkazgan.
Prognozlarga ko‘ra, 6-noyabr kuni Toshkentda havo sifati xalqaro AQI bo‘yicha asosan sezgir guruhlar uchun nosog‘lom, milliy indeks bo‘yicha esa asosan “yashil”, ayrim vaqtlarda “sariq” darajada bo‘lishi kutilmoqda.
Ayni paytda poytaxtda havo sifatini yaxshilashga qaratilgan nazorat va reyd tadbirlari davom ettirilmoqda. Ekologiya qo‘mitasi Ekopolitsiyasi tomonidan fuqarolar murojaatlari asosida “N.H.P” MChJ faoliyati o‘rganilib, korxonada ekologik talablar buzilgani aniqlangan.
Shuningdek, Toshkentdagi yana bir qurilish obyektida jiddiy ekologik qonunbuzarliklar qayd etilgan.
