Soxta YHXX xodimi pul undirdi: haydovchilarni chuv tushirgan o‘quvchi ushlandi
U xodim nomidan soxta profil yaratib, jarimalarni to‘lashga yordam berish bahonasida fuqarolardan pul olgan.
Samarqandda yo‘l harakati xavfsizligi xizmati xodimi nomidan Telegram’da soxta akkaunt ochib, haydovchilardan firibgarlik yo‘li bilan pul undirgan voyaga yetmagan shaxs aniqlandi. U jarimalarni to‘lashga yordam berish bahonasida fuqarolardan bank kartalariga pul o‘tkazishni so‘ragan.
Yo‘l harakati xavfsizligi xizmati ma’lumotiga ko‘ra, o‘quvchi Samarqand viloyati YHXX axborot xizmati rahbari Xurshid Safarovning Instagram sahifasidagi suratidan foydalanib, uning nomidan soxta Telegram akkaunti yaratgan.
Shundan so‘ng haydovchilarga murojaat qilib, avtomobillarida to‘lanmagan jarimalar borligini aytgan va ularni to‘lashga yordam berishni taklif qilgan. Ayrim fuqarolar unga 50 ming va 100 ming so‘mdan pul o‘tkazgan. Biroq o‘quvchi mablag‘larni jarimalarni to‘lashga emas, o‘z ehtiyojlari uchun sarflagan.
Holat yuzasidan Samarqand viloyati IIB Kiberjinoyatchilikka qarshi kurashish boshqarmasi xodimlari tomonidan tezkor choralar ko‘rilib, voyaga yetmagan shaxs aniqlangan va ushlangan.
Hozirda dastlabki surishtiruv ishlari olib borilmoqda. Shuningdek, uning boshqa shu kabi holatlarga aloqadorligi ham o‘rganilmoqda.
O‘quvchi o‘z qilmishidan pushaymonligini bildirib, Xurshid Safarov va fuqarolardan uzr so‘ragan. Uning otasi ham farzandining xatti-harakati uchun jamoatchilikdan kechirim so‘rab, bundan buyon uning tarbiyasi bilan o‘zi shug‘ullanishini aytgan.
