19 kishining nomiga avtokredit rasmiylashtirib, 6,3 mlrd so‘mni o‘zlashtirganlar ushlandi
Bu haqda Iqtisodiy jinoyatlarga qarshi kurashish departamenti xabar berdi.
Farg‘ona viloyati Qo‘qon shahrida fuqarolarning yirik miqdordagi kredit mablag‘larini talon-toroj qilgan masʼullar qo‘lga olindi.
Bosh prokuratura huzuridagi departamentning Qo‘qon shahri bo‘limi tomonidan tergovga qadar tekshiruv o‘tkazilgan. Unda fuqarolar Sh. U. va A.V. — Toshkent shahridagi G-W. va E.-W. MCHJlar masʼul shaxslari va boshqalar o‘zaro til biriktirib, 19 nafar fuqaro nomiga tijorat banki filiallaridan jami 6,3 mlrd so‘m avtokredit olgani aniqlangan.
Ular ushbu kredit hisobidan fuqarolarga avtomashinalarni yetkazib bermasdan, kredit mablag‘larini talon-toroj qilgan.
Mazkur holat yuzasidan Jinoyat kodeksining tegishli moddalari bilan jinoyat ishi qo‘zg‘atilib, tergov harakatlari o‘tkazilmoqda.
