Toshkentda 25 yoshli yigit shilqimligi uchun qamaldi
U o‘ziga notanish ayolga ko‘chada tegajog‘liq qilgan.
Kecha, 13 may kuni Toshkent shahar jinoyat ishlari bo‘yicha Chilonzor tuman sudida ko‘chada ayolga shilqimlik qilgan yigit bo‘yicha ish ko‘rib chiqildi.
Sud hujjatlariga ko‘ra, 11 may kuni soat 13:00 larda Toshkent shahar Chilonzor tumani 16-mavze 16-uy oldida 25 yoshli sudlanuvchi o‘ziga notanish bo‘lgan ayol g.I.ning turli joylaridan qo‘li bilan ushlab, shahvoniy shilqimlik qilganligi aniqlangan.
Shundan so‘ng, voqea joyiga yetib kelgan IIO xodimlari fuqaroni IIBga taklif qilishganida, u ichki ishlar organi xodimlarining qonuniy talablarini bajarmaganligi aniqlangan.
Sud qarori bilan yigitga nisbatan MJtKning 34-moddasi tartibida uzil-kesil 10 sutka maʼmuriy qamoq jazosi tayinlandi.
