Bozorda sotuvchilar va Milliy gvardiya xodimi mushtlashib ketdi — video
Mojaroda kim haq? Holat yuzasidan Milliy gvardiya Toshkent shahar bo‘yicha boshqarmasi izoh berdi.
Maʼlum qilinishicha, mazkur holat joriy yilning 15 may kuni soat 11:00 larda “Farhod” dehqon bozori hududida sodir bo‘lgan. Unda bozor maʼmuriyati chaqiruviga asosan Milliy gvardiya va profilaktika inspektori yetib kelib, noqonuniy yer usti savdosi bilan shug‘ullanayotgan fuqarolar bilan tushuntirish ishlarini olib borishgan.
Ular qatorida qulupnay sotayotgan va ushbu bozorda muntazam janjal keltirib chiqarishda nom taratgan fuqaro G.S. va B.M.lar huquqni muhofaza qilish organlari xodimlarning qonuniy talablariga bo‘ysunmasdan, faol qarshilik ko‘rsatib, atrofdagilar eʼtiborini o‘zlariga qaratgan holda janjal ko‘tarishgan.
Milliy gvardiya va profilaktika inspektorining ogohlantirishiga qaramasdan, jamoat joyidagi yurish-turish qoidalarini mensimagan ushbu fuqarolar esa o‘rnatilgan tartibda hududiy profilaktika inspektorining xizmat xonasiga olib borilgan.
Mazkur holat yuzasidan Milliy gvardiya xodimlari tomonidan surishtiruv ishlari olib borilib, ushbu shaxslarga nisbatan MJtKning 183- “Mayda bezorilik” va 194-1-“O‘zbekiston Respublikasi Milliy gvardiyasi xodimining qonuniy talablarini bajarmaslik” moddalarida nazarda tutilgan huquqbuzarlik sodir qilganliklari yuzasidan, tegishli hujjatlar rasmiylashtirildi va qonuniy chora ko‘rish uchun Jinoyat ishlari bo‘yicha Uchtepa tuman sudiga yuborildi.
