Jizzaxda 3 ta yuk mashinasi to‘qnashib ketdi
YHXB holat bo‘yicha ma’lumot berdi.
Jizzax viloyati Sharof Rashidov tumanida uchta yuk mashinasi ishtirokida yo‘l-transport hodisasi sodir bo‘ldi.
Maʼlum qilinishicha, 16 may kuni soat 10:30 larda Samarqand va Toshkent shaharlarini bog‘lovchi M-39 avtomobil yo‘lining 978-kilometrida Toshkent yo‘nalishida harakatlanib kelayotgan 29 yoshli haydovchi boshqaruvidagi Howo rusumli yuk avtomashinasining tormoz tizimida texnik nosozlik yuzaga kelgan.
Oqibatda o‘zidan oldinda ketayotgan boshqa bir Howo rusumli yuk mashinasi bilan to‘qnashib ketgan. Zarba kuchli bo‘lgani tufayli birinchi yuk mashina yo‘l chetiga ag‘darilgan. Shu vaqtda yo‘lning chap tomonida harakatlanib ketayotgan SANY rusumli yuk avtomobili ham ag‘darilib ketgan yuk mashinasi saloniga borib urilgan va qarama-qarshi yo‘nalishga chiqib ketgan.
Mazkur yo‘l-transport hodisasida hech kim jabrlanmagan. Hozirda viloyat Yo‘l harakati xavfsizligi boshqarmasi xodimlari hodisa sabablarini o‘rganmoqda.
