Biznes taklifi ortidagi firibgarlik: O‘zbekistonda qidiruvda bo‘lgan ayol Turkiyada ushlandi
U fuqarolarga qo‘shma biznes taklif qilib, katta miqdordagi pulni firibgarlik yo‘li bilan olganlikda gumonlanmoqda.
O‘zbekistonda qidiruvda bo‘lgan 1991-yilda tug‘ilgan M.N. ismli ayol Turkiyada qo‘lga olinib, O‘zbekistonga qaytarildi. Bu haqda O‘zbekistonning Istanbuldagi Bosh konsulligi matbuot xizmati xabar berdi.
Qayd etilishicha, ayol O‘zbekiston va Turkiya ichki ishlar vazirliklari hamkorligida o‘tkazilgan tezkor tadbir davomida ushlangan.
U fuqarolarning ishonchiga kirib, ularga hamkorlikda biznes yuritishni taklif qilish orqali katta miqdordagi mablag‘larni firibgarlik yo‘li bilan qo‘lga kiritganlikda gumonlanmoqda.
Mazkur holat yuzasidan O‘zbekiston Respublikasi Jinoyat kodeksining 168-moddasi 3-qismi bilan jinoyat ishi qo‘zg‘atilgan.
Ayni paytda ikki davlat huquqni muhofaza qiluvchi organlari hamkorligida qidiruvdagi boshqa shaxslarni aniqlash, qo‘lga olish va O‘zbekistonga qaytarish bo‘yicha tadbirlar davom ettirilmoqda.
