48 soatda 12 davlat bilan muloqot: Eron vaziri mintaqadagi vaziyatni muhokama qildi
Aroqchi Ummon, Misr, Turkiya, Saudiya Arabistoni va boshqa 8 davlat tashqi ishlar vazirlari bilan maslahatlashuv o‘tkazdi.
Eron tashqi ishlar vaziri Abbos Aroqchi so‘nggi 48 soat ichida 12 mamlakat tashqi ishlar vazirlari bilan telefon orqali alohida suhbatlar o‘tkazdi. Muloqotlarda mintaqadagi vaziyat va AQSh hamda Isroilning keskinlikni kuchaytirishi mumkin bo‘lgan harakatlari oqibatlari muhokama qilindi.
Aroqchi bu haqda Instagram’dagi sahifasida ma’lum qilgan. Uning yozishicha, Ummon, Misr, Iordaniya, Saudiya Arabistoni, Qatar, Kipr, Turkiya, Quvayt, Birlashgan Arab Amirliklari, Tunis, Iroq va Pokiston tashqi ishlar vazirlari bilan suhbatlashgan.
Eron tashqi ishlar vazirining ta’kidlashicha, maslahatlashuvlarda davlatlarning milliy suverenitetini hurmat qilish, tajovuz va tahdidlarga chek qo‘yish hamda tashqi kuchlarning mintaqaga vayronkor aralashuviga yo‘l qo‘ymaslik zarurligi qayd etilgan.
Shuningdek, u mintaqaviy davlatlarning beqarorlik yanada kengayishining oldini olishdagi mas’uliyatini ta’kidlagan.
Aroqchi Eronning o‘z suvereniteti va milliy xavfsizligini himoya qilishga qonuniy huquqi borligini, mintaqaviy xavfsizlik mexanizmlari esa mintaqadan tashqari kuchlarning aralashuvisiz shakllantirilishi kerakligini bildirgan.
