Chang, oltingugurt dioksidi va uglerod oksidi: Bekoboddagi korxonada ekologik qoidabuzarliklar aniqlandi
Korxona havoga me’yordan 1 533 baravar ko‘p zararli modda chiqargan.
Toshkent viloyatining Bekobod shahrida faoliyat yurituvchi “M.K.” korxonasida atmosfera havosiga chiqarilayotgan ifloslantiruvchi moddalar miqdori belgilangan me’yorlardan sezilarli darajada yuqori ekani aniqlandi. Bu haqda Ekologiya va iqlim o‘zgarishi milliy qo‘mitasi ma’lum qildi.
Qayd etilishicha, Ekopolitsiya xodimlari tomonidan korxonaning elektrda po‘lat eritish va ferroqotishmalar ishlab chiqarish bo‘linmalari faoliyati o‘rganilgan.
Laboratoriya tahlillari natijasida elektrda po‘lat eritish bo‘linmasida noorganik chang me’yordan 2,4 baravar, oltingugurt dioksidi 1 533 baravar, uglerod oksidi esa 20 baravar ko‘p chiqarilayotgani tasdiqlangan.
Ferroqotishmalar ishlab chiqarish bo‘linmasida ham ifloslantiruvchi moddalar miqdori me’yordan yuqori ekani aniqlangan. Xususan, noorganik chang 24,9 baravar, azot dioksidi 2,12 baravar, uglerod oksidi esa 23,3 baravar ko‘p chiqarilgan.
Shuningdek, elektrda po‘lat eritish sexidagi chang-gaz tozalash uskunalari samarali ishlamayotgani, buning oqibatida ifloslantiruvchi moddalarning bir qismi to‘g‘ridan-to‘g‘ri atmosferaga chiqib ketayotgani qayd etilgan.
O‘rganish davomida korxonada ekologik ekspertiza xulosalari talablari to‘liq bajarilmagani, ayrim ifloslantiruvchi manbalarda avtomatlashtirilgan monitoring tizimlari o‘rnatilmagani hamda laboratoriya nazorati yetarli darajada tashkil etilmagani ham ma’lum bo‘lgan.
Aniqlangan kamchiliklar yuzasidan hisob-kitob qilinib, korxonaga atrof-muhitni ifloslantirganlik uchun 1 milliard 630 million 920 ming 419 so‘m kompensatsiya to‘lovi belgilangan.
Bundan tashqari, korxonaga qonunbuzilishlarni bartaraf etish bo‘yicha majburiy ko‘rsatmalar berilgan. Jumladan, chang-gaz tozalash uskunalari filtrlarini to‘liq almashtirish, ularning samaradorligini kamida 95 foizga yetkazish, laboratoriya nazoratini kuchaytirish va asosiy ifloslantiruvchi manbalarga avtomatik monitoring stansiyalarini o‘rnatish topshirilgan.
