Metropoliten farroshi ish vaqtida gul olgani uchun oyligi “qirqilgani” aytildi
Holat yuzasidan munosabat bildirildi.
Ijtimoiy tarmoqlarda metropoliten farrosh xodimiga ish vaqtida yo‘lovchilardan biri gul taqdim etilgani va shu sababdan ushbu xodimning oylik maoshidan ogohlantirish tarzida kesilgani haqida xabarlar tarqaldi.
"Toshkent metropoliteni" DUKning maʼlum qilinishicha, video materialdagi xodim Alisher Navoiy bekatida 1,5 yildan buyon faoliyat olib boruvchi Nazarova Hilola ismli farrosh bo‘lib, unga nisbatan ushbu holat yuzasidan hech qanday ogohlantirish hamda oylik maoshidan jarima belgilanmagan.
"Shu o‘rinda ijtimoiy tarmoq foydalanuvchilaridan bu kabi o‘z tasdig‘ini topmagan maʼlumotlarni taqdim etmasliklarini va bunga qonunchilikda belgilangan tartibda javobgarlik borligini eslatib o‘tamiz", — deyiladi xabarda.
Avvalroq videoni tasvirga olgan bloger farroshning oyligi “qirqilgani”ni aytgandi.
"Ahamiyat bergan bo‘lsangiz, bir videoda farrosh opaga "gulni ushlab turing, oyog‘imni bog‘lab olay", degandim. Shu videodan keyin opaning oyligini qirqib tashlashibdi. Men o‘zimdan nafratlanib ketdim. Bir insonning sekundini olib xursand qilaman degan maqsadda video olgan edim. Balki u xursand bo‘lgandir, ammo video tarqalganidan keyin ularning oyligini qirqib tashlashibdi", — deydi bloger.
