Tanzila Narbayeva Ummon Sultonligining O‘zbekistondagi elchisi bilan uchrashuv o‘tkazdi
Uchrashuvda ikki mamlakat o‘rtasida savdo-iqtisodiy, madaniy-gumanitar va parlamentlararo aloqalarni rivojlantirish va yangi bosqichga olib chiqish masalalari ko‘rib chiqildi.
Oliy Majlis Senati raisi 27 may kuni Ummon Sultonligining O‘zbekistondagi favqulodda va muxtor elchisi Vafo Jabr Nosir al-Busaidiy bilan uchrashdi.
Tomonlar o‘zaro savdo aylanmasi ko‘rsatkichi ikki davlat salohiyatini ifoda etmasligini, tadbirkorlar o‘rtasida qo‘shma biznes loyihalarni faollashtirish lozimligini taʼkidladi.
Muloqot davomida fan, taʼlim, madaniyat yo‘nalishlaridagi hamkorlik, mamlakatlar turizm salohiyatidan yana-da kengroq foydalanish bo‘yicha amaliy saʼy-harakatlarni birlashtirish bo‘yicha fikr almashildi.
Shuningdek parlamentlararo muloqotni o‘zaro tashriflar orqali faollashtirish, ikki mamlakat qonun chiqaruvchi organlari tegishli qo‘mitalari o‘rtasida tajriba almashish va yaqin aloqalarni o‘rnatish muhimligi qayd etildi.
