2023-yilda “Haj”ga borgan 150 ming nafardan ortiq shaxs Saudiyadan chiqarib yuborilgan
“Haj” ziyoratiga noqonuniy borayotganlar ogohlantirildi.
2023 yilda dunyo mamlakatlaridan “Haj” ziyoratiga noqonuniy borgan 150 ming nafardan ortiq shaxs ushlanib, tegishli tartibda podshohlik hududidan chiqarib yuborilgan. Bu haqda Davlat xavfsizlik xizmati xabar berdi.
Qayd etilishicha, Vazirlar Mahkamasining qaroriga muvofiq, mamlakat fuqarolari uchun “Haj” tadbiri Din ishlari bo‘yicha qo‘mita va Saudiya Arabistoni Podshohligining Haj va umra vazirligi o‘rtasida har yili imzolanadigan shartnoma asosida, faqatgina O‘zbekiston musulmonlari idorasi tomonidan amalga oshiriladi. Bunday faoliyat bilan boshqa tashkilotlarning shug‘ullanishiga yo‘l qo‘yilmaydi.
Shuningdek, Saudiya Arabistoni tomonidan belgilangan tartibga muvofiq, “Haj” ziyoratini ado etish uchun chet el fuqarolaridan “haj” vizasi talab qilinadi. Qolgan barcha turdagi vizalar ( “umra”, “turizm”, “biznes” va boshqalar) bilan “Haj” safariga borish qatʼiyan taqiqlanadi.
O‘rnatilgan tartibni buzgan shaxs zudlik bilan Saudiya Arabistonidan deport qilinib, uning ushbu mamlakatga 10 yil muddatga kirishi taqiqlanadi hamda 2,5 ming AQSH dollaridan 13,5 ming AQSH dollarigacha miqdorida jarimaga tortiladi.
