Ekologik vaziyatni baholash uchun yagona monitoring tizimi ishga tushiriladi
Bu haqida Ekologiya, atrof-muhitni muhofaza qilish va iqlim o‘zgarishi vazirligi maʼlum qildi.
Axborot xizmati rahbari Lola Rahmonboyevaning bildirishicha, vazirlik va uning tizim tashkilotlarida raqamli infratuzilmani rivojlantirish bo‘yicha tizimli ishlar amalga oshirilmoqda.
Belgilanmagan joylarga chiqindi tashlanishining oldini olish maqsadida respublika bo‘yicha 200 ga yaqin videokameralar o‘rnatilib, vazirlikning situatsion markazida doimiy nazorati yo‘lga qo‘yildi.
Ekologiyaga oid masalalarni keng yoritish, aholining ekologik madaniyatini oshirish maqsadida “Ekologiya portali” axborot tizimi gov.uz.eco veb-sayti ishga tushirildi.
Yangi ekilgan daraxt va butalarni monitoring qilish, noqonuniy kesilishining oldini olish maqsadida “Yashil makon” yagona elektron axborot tizimi yashilmakon.eco yaratildi.
Kelgusida ekologiya sohasida xizmatlarni sifatli olib borish maqsadida vaziyatlar markazi faoliyati to‘liq yo‘lga qo‘yiladi. Yagona geoaxborot maʼlumotlar bazasini yuritish uchun monitoring tizimi ishga tushiriladi.
Vazirlikning mavjud yo‘nalishlarini raqamlashtirishda jami 8 ta axborot tizimi joriy etiladi. Elektron hukumatni rivojlantirish maqsadida vazirlik tomonidan ko‘rsatiladigan davlat xizmatlari aholi uchun soddalashtiriladi.
Tizimda mehnat qilayotgan mingdan ortiq xodimning IT sohasidagi bilim va malakalari oshiriladi. 20 nafar xodim xalqaro taʼlim platformalari orqali o‘qitiladi.
