O‘zbekistonda muammoli kreditlar ulushi rekord darajada o‘sdi

Markaziy bank eʼlon qilgan hisobotga ko‘ra, aprelda O‘zbekiston banklaridagi jami kredit qo‘yilmalari miqdori mart oyiga nisbatan 5,4 trillion so‘mga oshib, 483,6 trillion so‘mga yetdi. Shundan jismoniy shaxslarga 156,1 trillion so‘m, yuridik shaxslarga 327,5 trillion so‘m kredit ajratilgan. 

 

O‘tgan oyda ipoteka kreditlarining umumiy ulushi 60,7 trillion so‘mni, mikroqarzlar 28 trillion so‘mni, isteʼmol kreditlari 45,4 trillion so‘mni tashkil etdi. Hisobot davrida yuridik shaxslarga ajratilgan kreditlarning eng yuqori ulushi sanoat (29 foiz) hamda qishloq xo‘jaligi (11 foiz) sohalariga to‘g‘ri kelgan.

 

Aprel oyida jami kredit qo‘yilmalaridagi muammoli kreditlar ulushi martdagiga nisbatan 1,7 trillion so‘mga oshib, 23,3 trillion so‘mni tashkil etdi. Bunda “O‘zsanoatqurilishbank” muammoli kreditlari bir oyda 674 milliard so‘mga (umumiy 3 trillion so‘m), “Ipotekabank”niki 482 milliard so‘mga (3,2 trillion so‘m), “Milliy bank”niki 333 milliard so‘mga (4,2 trillion so‘m) oshdi va boshqa banklardagiga qaraganda eng yuqori o‘sishni qayd etdi.

 

Markaziy bank maʼlumotlariga ko‘ra, O‘zbekistonda 2020 yil apreldagi muammoli kreditlar miqdori 5,2 trillion so‘m bo‘lgan. Keyingi yillarning aprel oylarida bu ko‘rsatkich sezilarli o‘sish tendensiyasiga o‘tgan. Xususan, 2021 yil aprelida muammoli kreditlar ulushi 12,9 trillion so‘mga, 2022 yilda 18 trillion so‘mga yetgan. 2023 yil aprel yakunida muammoli kreditlar miqdori 14,8 trillion so‘m bo‘lgan. Yaʼni bir yil davomida qaytarilmagan kreditlar ulushi 3,2 trillion so‘mga kamaygan. Biroq 2024 yil aprelida muammoli kreditlar miqdoridagi o‘sish rekord darajani qayd etgan va bir yilda 8,5 trillion so‘mdan ortiq o‘sgan.