Toshkentda avtobus teplovoz bilan to‘qnashib ketdi
Holat yuzasidan rasmiy munosabat bildirildi.
Holat bugun, 29 may kuni soat 15:50 larda Sergeli tumani Qumariq ko‘chasida yuz bergan. 11-sonli yo‘nalish haydovchisi I. A. boshqaruvidagi avtobus tartibga solinmagan temiryo‘l kesishmasidan harakatlanib kelayotgan teplovoz bilan to‘qnashuv sodir etgan.
Hodisa oqibatida tan jarohati olganlar yo‘q, avtobus texnik shikastlangan. Yo‘l-transport hodisasi Toshkent shahar IIBB YHXB xodimlari tomonidan o‘rnatilgan tartibda rasmiylashtirilgan.
Dastlabki surishtiruv natijalariga ko‘ra, haydovchi A. I. avtobusni boshqarib kelib temir yo‘l kesishmasida to‘xtagan va boshqa transport vositalari bilan birga harakatni boshlab, temiryo‘l kesishmasidan o‘tayotganda teplovoz uning orqa o‘ng tomon kuzov qismiga kelib urilgan.
Shuningdek, teplovoz temiryo‘l kesishmasidan o‘tishidan avval yo‘nalish bo‘ylab transport vositalarini to‘xtatib turuvchi temiryo‘l nazoratchi xodimi voqea joyida bo‘lmaganligi sababli transport vositalarini to‘xtatish choralari ko‘rilmagan.
