O‘zbek tili izohli lug‘atining izohli.uz sayti ishga tushdi
Sayt Vazirlar Mahkamasi huzuridagi O‘zbek tilini rivojlantirish jamg‘armasi tashabbusi bilan tashkil etildi.
Davlat tilida ish yuritish asoslarini o‘qitish va malaka oshirish markazida O‘zbek tili izohli lug‘atining veb-sayti va uning mobil ilovasi – izohli.uz hamda “Zamonaviy tilshunoslik terminlarining izohli lug‘ati”, “O‘zbek tilida defektologiya terminlari lug‘ati”ning taqdimoti o‘tkazildi.
Ushbu elektron resurs hamda izohli lug‘atlar Prezidentning “Mamlakatimizda o‘zbek tilini yana-da rivojlantirish va til siyosatini takomillashtirish chora-tadbirlari to‘g‘risida” Farmoni ijrosini taʼminlash maqsadida yaratilgan.
Taqdimotda Vazirlar Mahkamasining Davlat tilini rivojlantirish departamenti rahbari Nodirjon Xolbo‘tayev, O‘zbek tilini rivojlantirish jamg‘armasi ijrochi direktori Aziz Eminov, Fanlar akademiyasining O‘zbek tili, adabiyoti va folklori instituti direktori Nizomiddin Mahmudov, Davlat tilida ish yuritish asoslarini o‘qitish va malaka oshirish markazi direktori Inomjon Azimov, “Isystem partners” MCHJ direktori Azam Nemadaliyev, shuningdek, vazirliklar va idoralarning davlat tili masalalari bo‘yicha maslahatchilari, jamoatchilik hamda OAV vakillari ishtirok etdi.
Tadbir avvalida so‘zga chiqqan Davlat tilini rivojlantirish departamenti rahbari N.Xolbo‘tayev bugungi kunda mamlakatimizda davlat tilida ish yuritishni yana-da takomillashtirish borasida amalga oshirilayotgan keng qamrovli islohotlarga alohida to‘xtalib o‘tdi. Shundan so‘ng izohli.uz veb-sayti va uning mobil ilovasi taqdimoti boshlandi.
“Izohli.uz” mobil ilovasi Vazirlar Mahkamasi huzuridagi O‘zbek tilini rivojlantirish jamg‘armasi hamda “Isystem partners” MCHJ tomonidan jamg‘arma mablag‘i hisobidan yaratilgan. Ushbu mobil ilovada O‘zbek tilining izohli lug‘atiga kiritilgan 80 000 dan ortiq so‘z va so‘z birikmalari joy olgan. Mazkur ilova yaqin orada ishga tushirilish arafasida.
Keyingi taqdimot filologiya fanlari doktori, professor Durdona Xudoyberganova boshchiligida tuzilgan “Zamonaviy tilshunoslik terminlarining izohli lug‘ati”ga bag‘ishlandi.
Lug‘atni yaratishda taniqli o‘zbek tilshunoslarining asarlari, xorijiy ilmiy adabiyotlar, turli lingvistik terminlarning izohli lug‘atlaridagi maʼlumotlardan foydalanilgan. Foydalanuvchilarga qulaylik yaratish maqsadida lug‘at so‘ngida kognitiv tilshunoslik, pragmalingvistika, lingvomadaniyatshunoslik, sotsiolingvistika kabi lingvistik sohalar va yo‘nalishlarning guruhlashtirilgan tarzdagi ko‘rsatkichi ilova qilingan.
Navbatdagi taqdimot filologiya fanlari bo‘yicha falsafa doktori Zaxro Urunova boshchiligida tuzilgan “O‘zbek tilida defektologiya terminlari lug‘ati”ga bag‘ishlandi. Ushbu lug‘at bugungi kunda juda ham zaruriy lug‘at ekani alohida taʼkidlanib, lug‘atning yaratilishidan nashr ettirilishigacha bo‘lgan bosqichi haqida so‘zlab berdi.
Tadbir ishtirokchilari mobil ilova va lug‘atlarga oid barcha savollarga javob olishdi.
