Qatar O‘zbekistondan ishchi kuchi jalb qilishni boshlaydi
Qatarda ayni vaqtda tibbiyot, taʼlim, IT, mahsulotlarni sanoat usulida qayta ishlash, mehmonxona xizmati va OAV sohalarida xorijlik ishchi kuchiga talab yuqori.
Kambag‘allikni qisqartirish va bandlik vazirligida Qatar davlat mehnat vaziri Ali bin Samih al-Marri boshchiligidagi delegatsiya aʼzolari bilan uchrashuv o‘tkazildi.
Uchrashuvda asosiy eʼtibor O‘zbekistondan Qatarga ishchi kuchini jalb etish, ularni tayyorlash va uyushgan tarzda yuborish masalalariga qaratildi.
2023 yilning 6 iyun kuni Samarqand shahrida ikki davlat hukumatlari o‘rtasida "Qatar davlati hududida ishchi kuchi bandligini tartibga solish to‘g‘risida"gi bitim imzolangan. Uchrashuvda ushbu bitimni hayotga tatbiq etish mexanizmlariga to‘xtalib o‘tildi.
Ushbu davlatda ishlash istagida bo‘lganlarni qiynayotgan eng katta masala bu — til to‘sig‘i ekani aytib o‘tildi. Kambag‘allikni qisqartirish va bandlik vaziri Behzod Musayev ushbu muammoni yechish bo‘yicha shu yerdagi mavjud tajribadan kelib chiqib ishchi kuchini maqsadli tayyorlash bo‘yicha o‘z takliflarini berdi.
Ali bin Samih al-Marri xorijdan borib ishlovchilarning huquqlari davlat tomonidan mustahkam himoya qilinishi, ayni maqsad va ko‘rsatkichlar 2008 yilda tasdiqlangan Qatar Vision – 2030 dasturida ham o‘z aksini topganini maʼlum qilgan. Shuningdek, xorijlik ishchilarning ijtimoiy himoyasi, tibbiy sug‘urtasi, oylik, transport va yashash joylari xarajatlarini ish beruvchi tomonidan to‘liq qoplash yo‘lga qo‘yilganini hamda chetdan borib ishlovchi ayollar huquqlarini himoya qilish bo‘yicha qo‘mita tashkil etilganini aytib o‘tgan.
Uchrashuvda qayd etilganidek, ikki davlat vazirliklari o‘rtasida qo‘shma komissiya tuzilib, uning navbatdagi yig‘ilishi Qatarda o‘tkaziladi va unda hamkorlikni yana-da rivojlantirishga oid bitim imzolanishi rejalashtirilmoqda.
