Qurilish firmasiga "chuv tushgan" fuqarolarning muammosi hal etildi
Yodingizda bo‘lsa, Toshkentda fuqarolardan hali qurilmagan kvartiralar uchun to‘lovlarni qabul qilib olgan firmaning vaʼda qilingan hududda turar joy majmuasi qurishga ruxsati bo‘lmagani va buning ortida aholida norozilik yuzaga kelgandi. O‘tgan yilning 21 iyul kuni Bosh vazir Abdulla Aripov Prezident topshirig‘iga ko‘ra aldangan fuqarolar bilan uchrashgandi.
O‘shanda Aripov uy bilan muammo bo‘lgan salkam 2 ming (1091) fuqaroning masalasi ijobiy hal bo‘lishini aytgandi.
Oradan salkam bir yil vaqt o‘tib, aldangan fuqarolarga Bektemir tumani "Iyk ota" MFY hududida “Yangi O‘zbekiston” massivi barpo etildi. Fuqarolarning muammosi hal bo‘ldi: kuni kecha ko‘p qavatli uylar foydalanishga topshirildi.
Unda shahar hokimi, nuroniylar, jamoatchilik vakillari, OAV xodimlari va yangi xonadon sohiblari ishtirok etdi. Tadbirda Toshkent shahar xokimi Sh.Umrzoqov so‘zga chiqib, yangi xonadon egalarini qutladi. So‘ngra bir nechta uy egalariga kalitlar topshirildi.
"Vatanda kichik vatanli bo‘lish saodati o‘zgacha baxt. Bugun quvonchim cheksiz. Biz “Aziya Invest favorit” qurilish kompaniyasidan jabrlangach ancha sarson bo‘ldik, halovatimiz yo‘qoldi. Ro‘zg‘orimda tinchlik buzuldi. Shukrki, bugun orzularimiz ushaldi. Buning uchun Prezidentimiz va mana shu xayrli ishlarda hissa qo‘shgan barchaga rahmat aytaman", — deydi Gulbeniz Mustafayeva.
Zamonaviy infratuzilmani o‘zida mujassam etgan massivdan jami 1 352 ta xonadondan iborat 18 ko‘p qavatli uylar o‘rin olgan. Shundan, 16 tasi 10 qavatli bo‘lsa, 2 tasi 16 qavatlidir. So‘nggi 9 oydagi bunyodkorlik namunasi bo‘lgan majmua qisqa muddatda “O‘zshahar qurilish Invest” injiniring kompaniyasi tomonidan bunyod etildi.
