“Mavorannahr” nomli yangi hujjatli serial yaratiladi
U turk kinoijodkorlari bilan hamkorlikda ishlab chiqarilishi rejalashtirilmoqda.
O‘zbekiston Milliy kino sanʼati saroyida Kinematografiya agentligi Badiiy kengashining turk kinoijodkorlari bilan yaratilishi rejalashtirilayotgan “Mavorannahr” kinoloyihasi bo‘yicha muhokama bo‘lib o‘tdi.
Unda Agentlik rahbariyati, va badiy kengash aʼzolari va eksperlari Sedat Sag‘irkaya boshchiligidagi turk kinoijodkorlaridan iborat delegatsiya bilan loyiha bo‘yicha muzokoralar o‘tkazdi.
Uchrashuv avvalida mehmonlar TRT Avaz telekanali bosh koordinatori Sedat Sag‘irkaya, prodyuser O‘mer Beyog‘lu, tarixchi va madaniyatshunos Isa Akpinar, rejissyor Ekrem Arslan va TRT O‘zbekiston vakolatxonasi rahbari Nizam Shahin kinosaroyni ko‘zdan kechirib, iliq fikrlar bildirdi.
Uchrashuvda “Mavorannaxr” deb nomlangan hujjatli serial ishlash masalasi muhokama qilindi. Taklif etilayotgan loyihaga ko‘ra, Movarounnahr o‘lkasining geografiyasi, fiqh ilmi, diniy taʼlimotlar, falsafa, arxitektura va hayot tarziga bag‘ishlangan 10 qismli serial ishlanadi.
Hujjatli serial loyihasi Badiiy kengash tomonidan iliq qabul qilindi. Shu mavzu yuzasidan loyiha taqdimoti o‘tkazilgach, turk kinoijodkorlari tomonidan O‘zbekistonda tarixiy manzillar, aktyorlar, texnik ko‘mak masalasida yordam so‘raldi. Taklif Badiiy kengash aʼzolari tomonidan qo‘llab-quvvatlanib, hujjatli serialni suratga olish ishlarida o‘zbek va turk olimlari hamkorlikda faoliyat yuritishi kerakligi taʼkidlandi.
