O‘zbekiston va Butunjahon intellektual mulk tashkiloti o‘rtasidagi hamkorlik mustahkamlanadi
Joriy yil 4 iyun kuni Shveysariyaning Jeneva shahrida O‘zbekiston Madaniyat va sanʼatni rivojlantirish jamg‘armasi raisi Gayane Umerova, O‘zbekiston Respublikasining Jeneva shahridagi BMT bo‘linmasi va boshqa xalqaro tashkilotlardagi Doimiy vakili Eldiyor Toshmatovning Butunjahon intellektual mulk tashkiloti (BIMT) Bosh direktori o‘rinbosari Silvi Forban bilan uchrashuvi bo‘lib o‘tdi.
Uchrashuv chog‘ida sunʼiy idrok davrida intellektual mulk huquqlari himoyasining ahamiyati muhokama qilindi. Tomonlar, shuningdek, ko‘plab mamlakatlarda kreativ sanoat tarmoqlarining rivojlanish surʼatlariga doir maʼlumotlarning taqchil ekanini taʼkidladilar. O‘z navbatida, BIMT vakillari tashkilot tomonidan mazkur masalaga yechim topishda amaliy vositalarni ishlab chiqish bo‘yicha faol ishlar amalga oshirilayotganini taʼkidladi.
Bundan tashqari, Butunjahon intellektual mulk tashkilotining IV Butunjahon kreativ iqtisodiyot konferensiyasi (WCCE) da ishtirok etish shakli muhokama qilindi. BIMT namoyandalari Toshkentdagi nufuzli anjumanni tashkil etishda to‘laqonli qo‘llab-quvvatlashga tayyor ekanligini qayd etib, konferensiya O‘zbekiston va Butunjahon intellektual mulk tashkiloti o‘rtasida yana-da yaqin hamkorlikni mustahkamlashga xizmat qilishini taʼkidladilar.
