Samarqandda KamAZ yo‘ldan o‘tayotgan ona-bolalarni urib yubordi
Avtohalokat oqibatida ayolning 2 farzandi halok bo‘ldi.
Samarqand viloyati Nurobod tumanida 4 iyun kuni voyaga yetmaganlar o‘limi bilan tugagan yo‘l-transport hodisasi sodir bo‘ldi. Bu haqida viloyat IIB matbuot kotibi Jahongir Sagdullayev xabar berdi.
Qayd etilishicha, hodisa soat 16:30 da tumanning “Mehnatkash” mahallasi hududidan o‘tuvchi Samarqand-G‘uzor A-378 avtomobil yo‘lining 35-kilometrida ro‘y bergan.
25 yoshli haydovchi P.Yo. “KamAZ-53212” yuk avtomashinasida harakatlanayotganda piyodalar o‘tish yo‘lakchasidan o‘tayotgan J.F. (ayol) va uning 2 nafar voyaga yetmagan farzandini urib yuborgan.
Oqibatda 2 bola tan jarohatlari bilan voqea joyida halok bo‘lgan. Ularning onasi Samarqand tumani markaziy shifoxonasiga yotqizilgan.
Holat yuzasidan viloyat IIB huzuridagi tergov boshqarmasi tomonidan Jinoyat kodeksining 266-moddasi 3-qismi “a” bandi (Odamlar o‘limiga sabab bo‘lgan holda transport vositalari harakati yoki ulardan foydalanish xavfsizligi qoidalarini buzish / muayyan huquqdan mahrum qilib, 10 yilgacha ozodlikdan mahrum qilish jazosi) bilan jinoyat ishi qo‘zg‘atilgan.
Haydovchi jinoyat ishida gumon qilinuvchi tariqasida jalb qilinib, himoya huquqi bilan taʼminlanib, Jinoyat-protsessual kodekning 227-moddasi tartibida ushlangan. Hozirda tergov harakatlari olib borilmoqda.
