Xorazmda inspektor kaltaklandi
U huquqbuzarlikni bartaraf qilishga uringanda qarshilikka uchragan.
Xorazm milliy tabiat bog‘i inspektori Amurbek O‘rinov xizmat vaqtida kaltaklandi.
Ekologiya vazirligi xabariga ko‘ra, hududda 2024 yil bahorida ekilgan 3000 tup gujum ko‘chatlari nobud bo‘lish holatiga kelib qolgan. Bunga milliy tabiat bog‘iga tutash hududda “Amudaryo oltin baliq” f/x tomonidan ajratilgan yer maydonidan tashqariga chiqib, gujum ko‘chatlari ekilgan joyga sholi ekish maqsadida maydon chetidagi katta himoya chegaralari buzib tashlangani va suv ochib yuborilgani sabab bo‘lgan.
Oqibatda gujum ko‘chatlari bir necha kundan buyon suv ostida qolib ketgan. Xorazm milliy tabiat bog‘i maʼmuriyati tomonidan fermer xo‘jaligiga 1 kun muddatda suv chiqarib yuborilmasa, 3000 dan ziyod ko‘chat nobud bo‘lishi va maʼmuriy javobgarlikka tortilishi yuzasidan ogohlantirish xati berilgan.
Ammo fermer xo‘jaligi rahbari A.O‘. ogohlantirishga parvo qilmasdan, 4 iyun kuni kechqurun soat tungi 00:00 lar atrofida bog‘ hududiga suv ochish maqsadida kirgan. Shu paytda uni inspektor payqab qolgan va huquqbuzarlikni bartaraf qilishga uringan. Lekin mast holatda bo‘lgan A.O‘. inspektorga qarshilik ko‘rsatgan va uni do‘pposlab, tan jarohati yetkazgan.
