O‘zbekistonlik ekologiya sohasidagi olimlar jahon miqyosida eʼtirof etilmoqda
Ekologiya vazirligi huzuridagi Atrof-muhit va tabiatni muhofaza qilish texnologiyalari ilmiy-tadqiqot instituti direktori, texnika fanlari doktori Baxtiyor Po‘latov Tabiatni muhofaza qilish xalqaro ittifoqining (IUCN) iqlim inqirozi bo‘yicha komissiyasiga aʼzo bo‘ldi.
O‘zbekistonning komissiyaga aʼzoligi xalqaro tashkilotlar va ilmiy ekspertlardan olingan eng yaxshi ilmiy maʼlumotlar va xulosalar asosida samarali, adolatli va ekologik toza yechimlarni ilgari surish imkonini beradi.
IUCN Iqlim inqirozi bo‘yicha komissiyasiga aʼzo bo‘lish orqali O‘zbekiston ekologik va iqlim o‘zgarishi bo‘yicha global kun tartibini shakllantiradigan milliy tashabbuslarni xalqaro maydonda targ‘ib qilishi mumkin.
Maʼlumot uchun, O‘zbekiston 2021 yilda Tabiatni muhofaza qilish xalqaro ittifoqiga aʼzo bo‘ldi. IUCN dunyodagi eng birinchi va eng yirik tabiatni muhofaza qilish tashkiloti bo‘lib, hukumat va fuqarolik jamiyati tashkilotlaridan iborat. U Birlashgan Millatlar Tashkiloti Bosh Assambleyasida kuzatuvchi maqomiga ega va butun dunyo bo‘ylab 1400 dan ortiq aʼzo tashkilotlar va 16 000 dan ortiq ekspertlarning tajribasi, resurslari va imkoniyatlaridan foydalanadi.
So‘nggi yillarda O‘zbekiston IUCN bilan hamkorlikni faol oshirmoqda: avvalroq, joriy yilning fevral oyida yurtimizdagi Markaziy Osiyo atrof-muhit va iqlim o‘zgarishini o‘rganish universitetida (“Green University”) Tabiatni muhofaza qilish xalqaro ittifoqining vakolatxonasi ochilgan edi.
