Samarqandda mast erkak oshxona mijozini pichoqlab qo‘ydi

Samarqandda mast erkak oshxona mijoziga og‘ir tan jarohati yetkazgani uchun ozodlikdan mahrum qilindi.

 

Maʼlum qilinishicha, sudlanuvchi Q.M. Payariq tumanida joylashgan “Billur” nomli oshxonada mast holatda oshxona mijozlariga tegajog‘lik qilib, ularni tinchini buzgan. Shu sababli,oshxonadagi mijoz X.F ayblanuvchiga ularga xalaqit qilmasdan, uyiga ketishini aytgan. Q.M. bundan g‘azablanib, yon cho‘ntagida bo‘lgan pichoq bilan uning ko‘krak sohasi chap tomoniga bir marotaba qasddan urgan. X.F. esa holat joyidan qochishga harakat qilgan. Q.M. ikkinchi marotaba ham tan jarohati yetkazish uchun uni izidan taʼqib qilgan vaqtda oshxonadagi boshqa fuqarolar uni to‘xtatib qolgan.

 

X.F. olgan og‘ir tan jarohati bilan Payariq tuman tibbiyot birlashmasi reanimatsiya bo‘limiga yotqizilgan. Sud tibbiyot ekspertizasining xulosasida, X.F.ning ko‘krak qafasi chap tomoni old yuzasida ko‘krak qafasi plevra bo‘shlig‘iga teshib o‘tuvchi, sanchilib, kesilgan yarasi kabi tan jarohati mavjudligi ko‘rsatilgan.

 

Sudda ayblanuvchi Q.M. aybiga iqror bo‘ldi. U Qozog‘istonga borib ishlab kelganini, qaytib kelgan kuni ayoli bilan janjallashib qolib, ko‘chaga chiqib ketganini va qishloq atrofida qadrdon do‘stini ko‘rib, u bilan birga oshxonaga borganini aytdi. Maʼlumotlarga ko‘ra, Q.M hamma pulini sarflab yuborgandan so‘ng, oshxona xizmatchisidan qarzga aroq so‘ragan. Ishchi unga rad javob bergani uchun, uning jahli chiqib shovqin ko‘targan. Undan keyingi holatlarni Q.M. qattiq mast bo‘lgani sababli eslay olmagan. U X.F.ning yurak sohasiga pichoq urgach, qishloq tomonga qochib ketgan va uyiga ertalabki soat 03:00 larda qaytib kelgan.

 

Sud xulosasiga ko‘ra, Q.M. Jinoyat kodeksining 25-moddasi (Jinoyatga tayyorgarlik ko‘rish va jinoyat sodir etishga suiqasd qilish) va 97-moddasi (Qasddan odam o‘ldirish) bilan aybli deb topilgan. Unga Jinoyat Kodeksining 57-moddasi (Yengilroq jazo tayinlash) qo‘llanib, 8 yil muddatga ozodlikdan mahrum qilish jazosi tayinlangan.