Toshkentda “Ozarbayjon madaniyati kunlari” o‘tkazilmoqda
Tadbirlar 14-iyunga qadar davom etadi.
Avvalroq 10-14 iyun kunlari O‘zbekistonda “Ozarbayjon madaniyati kunlari” doirasida tadbirlar o‘tkazilishi xabar qilingandi.
10-iyun kuni Ozarbayjon Respublikasi Madaniyat vazirligi delegatsiyasi, 11-iyun kuni esa Ozarbayjon Respublikasi madaniyat vaziri A.Kerimli Toshkent shahriga yetib keldi.
11-iyun kuni O‘zbekiston Yozuvchilar uyushmasida Ozarbayjon va O‘zbekiston ziyolilari uchrashuvi hamda “Muhammad Fuzuliy Kulliyoti” kitobining taqdimoti, so‘ngra Fuzuliy tavalludining 530 yilligiga bag‘ishlanshag Fuzuliy va Alisher kompozitsiyasi namoyishi bo‘lib o‘tdi.
Kunning ikkinchi yarmida Alisher Navoiy nomidagi O‘zbekiston Milliy kutubxonasida Ozarbayjon adabiy burchagi ochilish marosimi tashkil etildi.
“O‘zbekiston” xalqaro anjumanlar saroyida O‘zbekiston Respublikasi madaniyat vaziri O.Nazarbekov va Ozarbayjon Respublikasi madaniyat vaziri A.Karimli o‘rtasida uchrashuv tashkil etildi.
Uchrashuvda ikki tomonlama madaniy hamkorlik aloqalarining joriy holati, kelajakda amalga oshirilishi kutilayotgan loyihalar va tkliflar muhokama qilindi.
“O‘zbekiston” xalqaro anjumanlar saroyida “Ozarbayjon madaniyati kunlari” tadbirlarining tantanali ochilish marosimiga bag‘ishlangan konsert dasturi tashkil etildi. Konsert dasturida Ozarbayjonning tarixi va bugungi kunini o‘zida aks ettirgan kuy-qo‘shiqlar ijro etildi.
Konsert dasturi avvalida O‘zbekiston Respublikasi Prezidentining “Ozarbayjon madaniyati kunlari” tadbirlarining ishtirokchilariga yo‘llagan murojaatinin Prezident matbuot kotibi Sh.Asadov o‘qib eshittirdi.
“Ozarbayjon madaniyati kunlari” 14-iyunga qadar davom etadi. 12-iyun kuni O‘zbekiston Tasviriy sanʼat galereyasida “Ozarbayjon madaniyati” nomli ko‘rgazmaning ochilish marosimi, O‘zbekiston davlat sanʼat va madaniyat institutining o‘quv teatri binosida Ozarbayjon drama teatrining “Mana man” spektakli namoyishi, Alisher Navoiy nomidagi akademik davlat katta teatrida Ozarbayjon davlat opera teatri jamoasining “Arshin mal alan” spektakli namoyishi tashkil etilishi rejalashtirilgan.
Ertaga, 13-iyun kuni Muqimiy nomidagi O‘zbekiston davlat musiqali teatrida “Ozarbayjon madaniyati kunlari” tadbirlarining yopilish marosimiga bag‘ishlangan konsert dasturi o‘tkazilishi rejalangan.
