Koreya Prezidenti rafiqasi bilan Toshkentga keldi
Uni Bosh vazir Abdulla Aripov kutib oldi.
Prezident Shavkat Mirziyoyevning taklifiga binoan Koreya Respublikasi prezidenti Yun Sok Yol rafiqasi bilan 13-iyun kuni davlat tashrifi bilan O‘zbekistonga keldi.
Oliy martabali mehmonni Toshkent xalqaro aeroportida Bosh vazir Abdulla Aripov va boshqa rasmiy shaxslar kutib oldi. Oliy martabali mehmon sharafiga ikki davlat bayroqlari ko‘tarilib, faxriy qorovul saf tortdi.
Taʼkidlanishicha, tashrifning asosiy tadbirlari 14 iyun, juma kuni bo‘lib o‘tadi. Oliy darajadagi muzokaralar chog‘ida O‘zbekiston-Koreya do‘stligi va alohida strategik sheriklik munosabatlarini yana-da chuqurlashtirishning dolzarb masalalari muhokama qilinadi.
Sammit yakunlari bo‘yicha qator hukumatlararo va idoralararo hujjatlar imzolanishi rejalashtirilgan. Bundan tashqari, ikki davlat prezidentlarining qo‘shma biznes-forumda ishtirok etishi rejalashtirilgan.
Dasturga muvofiq, Janubiy Koreya rahbari Samarqand shahriga ham tashrif buyurib, mamlakatimizning boy madaniy-tarixiy merosi bilan tanishadi.
