Samarqandda Nexia-3 yuk mashinasi bilan to‘qnashdi
Hodisa oqibatida vafot etganlar bor.
Kecha, 15-iyun kuni Samarqand viloyatining Ishtixon tumanida odam o‘limi bilan bog‘liq yo‘l-transport hodisasi yuz berdi. Bu haqida viloyat IIB YHXB maʼlum qildi.
Hodisa soat 12:10 larda Ishtixon tumani “Qirqyigit” mahallasi hududidan o‘tuvchi yo‘lda sodir bo‘lgan. Nexia-3 rusumli avtomobil haydovchisi “Samarqand-Buxoro” yo‘nalishida o‘zi bilan bir yo‘nalishda harakatlanayotgan yuk mashinasining orqa tomonidan kelib urilgan.
Oqibatda Nexia-3 old o‘rindig‘ida bo‘lgan yo‘lovchi olgan tan jarohati tufayli voqea joyida, avtomobilning orqa o‘rindig‘ida bo‘lgan yo‘lovchisi esa tuman markaziy shifoxonasining jonlantirish bo‘limida vafot etgan.
Hozirda holat yuzasidan Samarqand viloyati IIB huzuridagi TB tomonidan jinoyat ishi qo‘zg‘atilib, dastlabki surishtiruv ishlari olib borilmoqda.
