Toshkentda AQSHga ishga yubormoqchi bo‘lgan firibgar ushlandi
U pul evaziga fuqaroni aylanma yo‘llan orqali AQSHga jo‘natmoqchi bo‘lgan.
Toshkent shahrining Chilonzor va Sergeli tumanlarida xorijiy davlatlarga ishga yuborishni vaʼda qilgan firibgarlar ushlandi. Bu haqida Bosh prokuratura huzuridagi Iqtisodiy jinoyatlarga qarshi kurashish departamenti xabar berdi.
O‘tkazilgan tezkor tadbirda fuqaro I.A. fuqaro Sh.Sh.ning ishonchiga kirib, uni tanishlari yordamida Turkiya davlati orqali aylanma yo‘llar bilan Amerika Qo‘shma Shtatlariga yuborishi evaziga 334 mln so‘mni olgan vaqtida ashyoviy dalillar bilan ushlangan.
Shuningdek, Sergelida o‘tkazilgan tezkor tadbirda fuqaro V.G. fuqaro A.Yu.ni tanishlari yordamida Polsha davlatiga ishga yuborishi evaziga 550 AQSH dollarini olgan vaqtda ashyoviy dalillar bilan ushlangan.
Mazkur holatlar yuzasidan Jinoyat kodeksining 168-moddasi (firibgarlik) va 28, 211-moddasi (pora berish) bilan jinoyat ishlari qo‘zg‘atilib, tergov harakatlari o‘tkazilmoqda.
