Farg‘onada alimentdan 10 yillik qarzdor ota ushlandi
Unga 2022 yilning yanvar oyida qidiruv eʼlon qilingandi.
Farg‘onada 10 yil davomida farzandiga aliment to‘lashdan qochib yurgan ota qo‘lga tushdi. Bu haqda Majburiy ijro byurosi Farg‘ona viloyati boshqarmasi xabar berdi.
Ijro hujjatiga ko‘ra, Farg‘ona shahrida yashovchi A.T.dan ikki nafar farzandining moddiy taʼminoti uchun aliment undirilishi belgilangan.
Mazkur ijro hujjati yuzasidan qarzdor ota aliment to‘lovlaridan bo‘yin tovlab qochib yurganligi sababli unga nisbatan 2022 yilning yanvar oyida qidiruv eʼlon qilingan.
Olib borilgan tezkor qidiruv ishlariga ko‘ra, qarzdor ota 2014 yil fevral oyida Rossiya davlatiga chiqib ketgani aniqlangan.
2024 yil iyun oyida Rossiya davlatidan qaytgan qarzdor ota Farg‘ona shahridan topilib, davlat ijrochisiga topshirilgan.
“Qarzdorga nisbatan Maʼmuriy javobgarlik to‘g‘risidagi kodeksning 47-4-moddasiga (Voyaga yetmagan yoki mehnatga layoqatsiz shaxslarni moddiy taʼminlashdan bo‘yin tovlash) asosan qonuniy chora ko‘rilmoqda”, deyiladi xabarda.
