Eng namunali bog‘chalarda gimnastika xonalari tashkil qilinadi
Bu bo‘yicha Prezident Farmoni qabul qilindi.
Unga ko‘ra, 2024-yil 1-sentyabrgacha ixtisoslashtirilgan sport maktablari uchun maqbullashtirilgan o‘quv rejalari ishlab chiqiladi.
Bunda O‘zbekiston tarixi va ingliz tili fanlarining chuqurlashtirilgan holda o‘qitilishiga hamda umumlashgan tabiiy fan va sport psixologiyasining zamonaviy usullarda o‘rgatilishiga alohida eʼtibor qaratiladi.
Ixtisoslashtirilgan sport maktablarida ikkinchi xorijiy tilni o‘rgatish yo‘lga qo‘yiladi.
Har bir tuman va shahardan kamida 3 tadan eng namunali davlat maktabgacha taʼlim tashkilotlari tanlab olinib, gimnastika xonalari tashkil qilinadi.
Farmonga muvofiq, ixtisoslashtirilgan sport maktablarida:
➖o‘quv-tarbiya jarayoni 5–11-sinflar doirasida maxsus taʼlim dasturlari bo‘yicha tashkil etiladi;
➖qabul jarayonlariga xalqaro va mahalliy trener-seleksionerlar jalb qilinadi;
➖taʼlim jarayoni o‘quvchilar soni 12 nafardan 24 nafargacha sinflarda amalga oshiriladi;
➖o‘quvchilarining umumiy cheklangan soni 168 nafar etib belgilanadi.
2024/2025 o‘quv yilidan har yili mahalliy va xorijiy sport ustalari, trener hamda mashhur sportchilar ishtirokida mahorat darslari o‘tkaziladi.
Farmonga asosan, ixtisoslashtirilgan sport maktablari o‘quvchi-sportchilari O‘zbekiston chempionati va kubogi musobaqalarida alohida jamoa sifatida to‘g‘ridan-to‘g‘ri ishtirok etadi.
Shuningdek, ixtisoslashtirilgan sport maktablari tizimida boks va gimnastika bo‘yicha trenerlar maktabi tashkil qilinadi.
2024-yil 1-sentyabrdan ixtisoslashtirilgan sport maktablari xodimlariga har oylik 100 foizgacha ustama to‘lash tartibi joriy etiladi.
