G‘azoda HAMAS guruhi bilan jangning shiddatli bosqichi nihoyasiga yetmoqda
Bu haqida Binyamin Netanyahu Isroil matbuotiga bergan intervyusida aytdi.
"Bu urush tugaydi degani emas, ammo hozirgi bosqichdagi urush Rafahda tugaydi. Bu haqiqat", — dedi u 14-kanal jurnalistlariga.
Bosh vazir, shuningdek, G‘azoda asirga olingan garovdagilarni qaytarish bo‘yicha HAMAS bilan "qisman kelishish"ga tayyor ekanini aytdi, biroq urush HAMAS yo‘q qilinmaguncha davom etishini yana bir bor taʼkidladi.
Netanyahuning aytishicha, G‘azodagi shiddatli janglar tugagach, Isroil so‘nggi haftalarda “Hizbulloh” bilan janglar avj olgan Livan bilan shimoliy chegarasiga qo‘shimcha kuchlarni joylashtirishi mumkin.
"Biz buni, birinchi navbatda, mudofaa maqsadida, ikkinchidan, fuqarolarimizni uylariga qaytarish uchun qilamiz. Agar buni siyosiy jihatdan qila olsak, ajoyib bo‘lar edi. Agar bunday bo‘lmasa, biz boshqacha yo‘l tutamiz, lekin biz hammani — shimol va janubning barcha aholisini uyiga qaytaramiz", — deya qo‘shimcha qildi Netanyahu.
