Samarqandda xalqaro yoshlar ekologik oromgohi ish boshladi
Tadbir 30-iyunga qadar davom etadi.
Joriy yilda Markaziy Osiyoning barcha mamlakatlari — O‘zbekiston, Qozog‘iston, Qirg‘iziston, Tojikiston va Turkmaniston ekologiya faollari safiga Ozarbayjon, Vengriya va Turkiyadan kelgan ishtirokchilar qo‘shildi.
Tashkilotchilar — “Zamin” xalqaro jamoat fondi, Ekologiya, atrof-muhitni muhofaza qilish va iqlim o‘zgarishi vazirligi, Maktabgacha va maktab taʼlimi vazirligi, Yoshlar ishlari agentligi, UNICEF, BMTning Taraqqiyot dasturi hamda Oziq-ovqat va qishloq xo‘jaligi tashkiloti.
Tadbirdan ko‘zlangan maqsad iqlim o‘zgarishiga qarshi kurashda yoshlarning rolini yoritish, yosh ekologik faollarga o‘z taklif va tashabbuslarini ilgari surish imkoniyatini berish, mazkur hududlarda yoshlar ekologik harakatining integratsiyalashuviga ko‘maklashishdan iborat.
Oromgoh doirasida seminarlar, xalqaro ekspertlar bilan iqlim kun tartibidagi dolzarb mavzular bo‘yicha munozaralar bo‘lib o‘tadi, shuningdek, COP-29 ko‘rgazmasida mamlakatlar taqdim etishni rejalashtirayotgan loyihalarni ishlab chiqish va muhokama qilish, ularda yosh eko-rahbarlar ishtirok etishi masalalariga eʼtibor qaratiladi.
