Buxoroda to‘yi bo‘lgan voyaga yetmagan kelin-kuyovlarning ota-onasi jazolanadi
Bolalar ombdusmani ushbu holat yuzasidan munosabat bildirdi.
Ijtimoiy tarmoqlarda Buxoroda voyaga yetmaganlarning to‘y marosimi aks etgan video tarqaldi.
Holat Bolalar ombudsmani tomonidan alohida kuzatuvga olindi.
O‘rganish davomida aniqlanishicha, 2008 yilda Shofirkon tumanida tug‘ilgan A.A. (o‘g‘il bola) 2007 yilda Qorako‘l tumanida tug‘ilgan R.N. (qiz bola) ning o‘rtasida ikkala voyaga yetmaganning oilalari o‘zaro kelishuvi asosida joriy yilning 29 iyun kuni nikoh to‘yi bo‘lib o‘tgan.
Mazkur holat yuzasidan Qorakul tuman IIB huzuridagi tergov guruhi tomonidan tergovga qadar tekshiruv harakatlari olib borildi.
Bugun, 2-iyul kuni voyaga yetmaganlarning ota-onalari N.S. va N.Q. larni MJtKning 47-3 moddasi (Nikoh yoshi to‘g‘risidagi qonunchilikni yoki nikoh tuzish tartibini buzish) bilan maʼmuriy javobgarlikka tortish yuzasidan hujjatlar sudga yuborildi.
Eslatib o‘tamiz, Oila kodeksining 15-moddasiga asosan, nikoh yoshi erkaklar va ayollar uchun 18 yosh etib belgilangan. Bu qonuniy talabning buzilishi bolaning taʼlim olish, sog‘lig‘ini saqlash hamda jismoniy, aqliy va maʼnaviy uyg‘un ravishda kamol topishi huquqlariga mutlaqo ziddir.
