Toshkentda maktab o‘quvchisi odam urib yubordi
U yuqori tezlikda va svetoforning qizil chirog‘ida harakatlangan.
Toshkentning Uchtepa tumanida 16 yoshli yigit Malibuda piyodani urib ketdi. Holat yuzasidan shahar IIBB YHXB rasmiy munosabat bildirdi.
Voqea 27 iyun kuni soat 20:10 larda TXAY ko‘chasi “Ko‘rkam obod” MFY Milliy gvardiya binosi qarshisida sodir bo‘lgan. 16 yoshli yigit A.X. Malibu-2 avtomashinasini katta tezlikda boshqarib ketayotib, yo‘lning belgilanmagan qismidan kesib o‘tayotgan 39 yoshli erkakni urib yuborgan. Tan jarohatlari olgan piyoda shifoxonaga yotqizilgan.
Malibu-2 ni boshqargan yigit Uchtepa tumanidagi 312-maktabning 10-sinf o‘quvchisi bo‘lib, hodisa vaqtida avtomobilda yana uch nafar tengdoshi bo‘lgan. Ular yuqori tezlikda va svetoforning qizil chirog‘ida harakatlangan.
Ayni paytda holat yuzasidan Toshkent shahar IIBB Tergov boshqarmasi tomonidan Jinoyat kodeksining 266-moddasi (transport vositalari harakati yoki ulardan foydalanish xavfsizligi qoidalarini buzish) 1-qismi bilan jinoyat ishi qo‘zg‘atilgan, tergov harakatlari olib borilmoqda.
