Andijondagi qoramollarda nomaʼlum kasallik aniqlandimi?
Bu bo‘yicha o‘rganish ishlari olib borilib, natijasi eʼlon qilindi.
Avvalroq Andijon viloyatidagi qoramollarda nodulyar dermatitga o‘xshash nomaʼlum kasallik tarqalayotgani haqida xabarlar eʼlon qilingandi.
Holat Veterinariya va chorvachilikni rivojlantirish qo‘mitasi Ishchi guruhi va ichki ishlar idoralari mutaxassislari bilan hamkorlikda o‘rganildi. Hozirda voqea joyi aniqlanib, holat nazoratga olingan.
O‘rganish davomida Ijtimoiy tarmoqlarda rasm va videolari tarqalgan qoramol Izboskan tumani “Anorzor” MFYda yashovchi Xayrulla Eshonjonovga tegishli ekanligi aniqlangan.
Qoramol klinik ko‘rikdan o‘tkazilib, olingan qon va boshqa namunalar laboratoriya tekshiruvlaridan o‘tkazilganda ushbu sigir nodulyar dermatit yoki nomaʼlum kasallik bilan emas, allergik toshmaga chalinganligi aniqlandi.
Maʼlum bo‘lishicha, sigirning terisiga bundan 24 kun muqaddam, yaʼni 15 iyun kuni allergik toshma toshgan. Bu haqida egasi mahalliy veterinariya mutaxassisiga murojaat qilgan.
Mutaxassislar klinik ko‘rikdan o‘tkazib, davolash ishlari olib borgan. Qoramolning ishtahasi o‘rniga kelgan. Umumiy holati yaxshilangan va allergik toshmalar yo‘qolgan. 18 iyun kuni ushbu sigir sog‘lom buzoq tuqqan. Hozirda sigir va bolasining umumiy holati yaxshi.
Surishtiruv davomida unga ozuqa orqali allergik toshma toshganligini egasi ham tasdiqladi. Xonadondagi qolgan 8 bosh qoramolda bunday holat kuzatilmagan.
