Xorazmda sanʼat maktabi xodimi pora bilan ushlandi
U fuqaroni pul evaziga institutga kiritib qo‘ymoqchi bo‘lgan.
O‘zbek milliy musiqa sanʼati institutiga o‘qishga kiritib qo‘yishni vaʼda qilgan bo‘lim boshlig‘i ushlandi. Bu haqida Iqtisodiy jinoyatlarga qarshi kurashish departamenti xabar berdi.
O‘tkazilgan tezkor tadbirda Urganch ixtisoslashtirilgan sanʼat maktabi bo‘limi boshlig‘i Sh.S. fuqaro J.K.ni tanishlari yordamida Yunus Rajabiy nomidagi o‘zbek milliy musiqa sanʼati institutiga o‘qishga kiritib qo‘yishi evaziga 4 000 AQSH dollarini olgan vaqtida ashyoviy dalillar bilan ushlangan.
Mazkur holat yuzasidan Jinoyat kodeksining 168-moddasi (firibgarlik) va 28, 211-moddasi (pora berish) bilan jinoyat ishi qo‘zg‘atilib, tergov harakatlari o‘tkazilmoqda.
