Bo‘stonliqda salkam 1 mlrd so‘mlik elektr o‘g‘irlandi
Hozirda holat yuzasidan tegishli hujjatlar rasmiylashtirilgan.
Toshkent viloyatining Bo‘stonliq tumanida 2 nafar fuqaro 917,2 mln so‘mlik elektr energiyasidan noqonuniy foydalangani aniqlandi. Bu haqida Energetika vazirligi xabar bermoqda.
Qayd etilishicha, Bo‘stonliq tumanida fuqaro Sh.D. ga qarashli turarjoyning elektr hisoblagichi “elektrohisob” dasturida yo‘qligi hamda hisoblagich muhrlanmasdan tarmoqqa to‘g‘ridan-to‘g‘ri ulanib, 745,7 mln so‘mlik elektr energiyasidan noqonuniy foydalanilgani aniqlangan.
Shuningdek, Bo‘stonliq tumanida yana bir fuqaro K.X. ga qarashli turarjoyning elektr hisoblagichi “elektrohisob” dasturida yo‘qligi sababli o‘zboshimchalik bilan noqonuniy ravishda tarmoqqa ulanib, 171,5 mln so‘mlik elektr energiyasidan noqonuniy foydalanilgani maʼlum bo‘lgan.
Hozirda mazkur holatlar yuzasidan tegishli hujjatlar rasmiylashtirilib, huquqni muhofaza qiluvchi organlarga yuborildi.
