Bekobodda 1 mlrd so‘mlik kredit mablag‘lar talon-toroj qilindi
Hozirda holat yuzasidan jinoyat ishi qo‘zg‘atilgan.
Qayd etilishicha, Bekobod tumanidagi sut va sut mahsulotlari yetishtirish hamda naslli chorva mollarni ko‘paytirish bilan shug‘ullanuvchi «BF» MCHJga Avstriya davlatidan 65 bosh naslli, yirik shoxli chorva mollari olib kelish maqsadida 2020 yilda bank tomonidan 7 yil muddatga 2 yil imtiyozli davr bilan yillik 19 foiz ustama to‘lash, shundan 3 foizini Vazirlar Mahkamasi huzuridagi Tadbirkorlik faoliyatini rivojlantirishni qo‘llab-quvvatlash davlat jamg‘armasi hisobidan qoplab berish sharti bilan 1 mlrd 680 mln so‘m kredit mablag‘lari ajratilgan.
Shuningdek, Vazirlar Mahkamasining 2020 yildagi “Chorvachilik tarmog‘iga davlat tomonidan subsidiya ajratishni tartibga soluvchi normativ-huquqiy hujjatlarni tasdiqlash to‘g‘risida”gi 280-sonli qarori bilan tasdiqlangan Nizomga asosan, xorijdan keltirilgan chorva mollari uchun 116 mln so‘mlik subsidiya mablag‘i ham ajratilgan.
Ammo MCHJ tomonidan bankka taqdim qilingan biznes rejada ko‘rsatilgan sut mahsulotlari yetishtirish va naslli mollarni ko‘paytirish, ularni 2 avlod olgungacha saqlash bilan bog‘liq ishlar amalga oshirilmasdan, aksincha, 44 bosh naslli, yirik shoxli chorva mollari naqd pulga sotib yuborilgan. Buning natijasida 1 mlrd 82 mln so‘mlik kredit mablag‘lari talon-toroj qilingan.
Ajratilgan kredit mablag‘larining maqsadli sarflanishi yuzasidan bank tomonidan kerakli darajada monitoring ishlari olib borilmagan.
Hozirda holat yuzasidan MCHJ mansabdor shaxslariga va bank mansabdorlariga nibatan Jinoyat Kodeksining tegishli moddalari bilan jinoyat ishi qo‘zg‘atilib, tergov harakatlari olib borilmoqda.
