“Yangi-Angren IES” 6 oylik rejani ortig‘i bilan bajardi
Hozirda stansiyada kuz-qish mavsumiga tayyorgarlik ishlari ketmoqda.
Yangi-Angren IES mamlakatimiz energetika tizimidagi ko‘mirga ixtisoslashgan eng yirik elektr stansiya hisoblanadi. Mazkur yirik energoinshoot Angren shahri, Ohangaron tumani va aholi zich joylashgan Farg‘ona vodiysi aholisini elektr energiyasi bilan taʼminlovchi asosiy elektr stansiya sanaladi.
Shu kunlarda korxonada isteʼmolchilarni barqaror va sifatli elektr energiyasi bilan taʼminlash barobarida 2024/2025 yillar kuz-qish mavsumiga tayyorgarlik ishlari olib borilyapti. Elektr stansiyasida kechayotgan jarayonlar bilan keng jamoatchilikni yaqindan tanishtirish maqsadida OAV vakillari, jurnalist va blogerlar ishtirokida press-tur tashkil etildi.
Elektr stansiya o‘tgan asrning 1985 yillarida ishga tushirilgan. Korxonada har birining quvvati 300 MVtga teng bo‘lgan 7 ta energoblok mavjud bo‘lib, umumiy o‘rnatilgan quvvat 2100 MVtni tashkil etadi. Issiqlik energiyasi ishlab chiqarish quvvati esa 186 ming Gkalga teng. Elektr stansiya Nurobod shaharchasi hamda stansiyaga yondosh hududda joylashgan issiqxonalar isteʼmolchilariga issiqlik energiyasi yetkazib beradi. Korxonada 1600 nafardan ziyod ishchi-xodimlar mehnat qilib kelmoqda.
Stansiya yilning to‘rt faslida, ayniqsa, qish mavsumida kuzatiladigan anomal sovuq ob-havo sharoitida tabiiy gaz bosimi nisbatan tushib ketgan vaqtlarda elektr energiyasi ishlab chiqarish uzluksizligini taʼminlashga xizmat qilyapti.
Isteʼmolchilarni uzluksiz elektr va issiqlik energiyasi bilan taʼminlash maqsadida joriy yilning 6 oyi davomida rejaga ko‘ra 2,44 mlrd. kVt.soat elektr energiyasi, 112 ming Gkal issiqlik energiyasi ishlab chiqarilishi belgilangan edi. Amalda esa 2,55 mlrd kVt.soat elektr energiyasi hamda 118,1 ming Gkal issiqlik energiyasi ishlab chiqarildi. Reja ko‘rsatgichi 104,4/105,5 foizga (104,4 elektr energiyasi, 105,5 issiqlik energiyasi) bajarilishiga erishildi. Maʼlumot uchun, Yangi-Angren IESda yiliga o‘rtacha 5 mlrd. kVt.soat elektr, 200 ming Gkal issiqlik energiyasi ishlab chiqariladi.
Ayni damda stansiyada 2024/2025 yillar kuz-qish mavsumiga tayyorgarlik kampaniyasi doirasida belgilangan vazifalar bosqichma-bosqich amalga oshirilmoqda. Energobloklar va qurilmalarda mukammal, o‘rta va joriy taʼmir ishlari olib borilyapti.
Bugunga qadar taʼmir rejasiga ko‘ra, 1-sonli energoblokda mukammal taʼmirlash ishlari yakuniga yetkazilib, energoblok kuz-qish mavsumiga shay holatga keltirildi. Ayni kunlarda stansiyaning 4-sonli energoblokida o‘rta taʼmir ishlari olib borilmoqda. Press-tur ishtirokchilari amalga oshirilayotgan mazkur taʼmir jarayonlari bilan yaqindan tanishish imkoniga ega bo‘ldilar.
Press-tur ishtirokchilari stansiyada ishlab chiqarilgan elektr energiyasining yagona energotizimga uzatilishida muhim hisoblangan 500/220 kv kuchlanishga ega ochiq taqsimlash qurilmalari faoliyati bilan ham yaqindan tanishdilar.
Qatnashchilar shuningdek, energoqurilmalarni boshqarish pulti hamda stansiyaning 5-sonli energobloki misolida korxonada elektr energiyasini ishlab chiqarish jarayoni bilan tanishdilar.
5-sonli energoblok turbina qurilmasining umumiy og‘irligi 690 tonna bo‘lib, 300 MVt quvvatga ega. Qozonxonada suv qaynatilib o‘tkir bug‘ hosil qilinadi. So‘ngra u og‘irligi naqd 400 tonna keladigan energoblok rotorini daqiqasiga 3000 ming marotaba aylantirishi hisobiga generatorda elektr energiyasi hosil bo‘ladi.
OAV vakillari press-tur davomida korxona faoliyati bo‘yicha o‘zlarini qiziqtirgan savollarga atroflicha javob oldilar.
