Toshkentda ayollar kiyimini kiyib yurgan erkak qamaldi
Shuningdek, unga nisbatan jarima jazosi tayinlandi.
Avvalroq Toshkent shahrining Bektemir tumanida yuzini berkitib, ayollar kiyimini kiyib olgan erkak aniqlangani xabar qilingandi.
Bugun, 24 iyul kuni mazkur ish jinoyat ishlari bo‘yicha Bektemir tuman sudida ko‘rib chiqildi va erkakka nisbatan 7 sutka maʼmuriy qamoq hamda 3,4 mln so‘m jarima jazosi tayinlandi.
Huquqbuzar erkak o‘z ko‘rsatmasida Bektemir tumani “Qo‘yliq dehqon bozori” atrofida burqa libosida, yuzini niqob bilan yopgan holda yurganida IIO xodimlari uni to‘xtatib, yuzini ochishni so‘raganida, dastlab ularga qarshilik ko‘rsatganini, keyin chetroqqa o‘tib, yuzini ochganligini, hozirda sodir etgan qilmishidan pushaymonligini, bunday holat boshqa takrorlanmasligini bayon qilib, yengilroq jazo tayinlashni so‘ragan.
Fuqaroning mazkur huquqbuzarlikni sodir etganlikdagi aybi ish hujjatlaridagi dalolatnoma, maʼlumotnoma, tushuntirish xatlari, fotosuratlar hamda maʼmuriy ishda to‘plangan boshqa hujjatlar bilan to‘liq o‘z isbotini topgan.
Sud qaroriga ko‘ra, huquqbuzar O‘zbekiston Respublikasi Maʼmuriy javobgarlik to‘g‘risidagi kodeksning 184-4-moddasi va 195-moddasida nazarda tutilgan huquqbuzarlikni sodir etgan deb topilgan va unga nisbatan 3,4 mln so‘m jarima hamda 7 sutka maʼmuriy qamoq jazosi tayinlangan.
