O‘zbekistonlik alpinistlar ilk marta O‘zbekistonning eng baland nuqtasiga ko‘tarildi
Ular Surxondaryo viloyatida joylashgan 4668 metr balandlikdagi cho‘qqiga ko‘tarilib, mamlakat bayrog‘ini o‘rnatishdi.
Tarixda birinchi bor o‘zbek alpinistlari O‘zbekistonning eng yuqori nuqtasi – Surxondaryo viloyatida joylashgan 4668 metr balandlikdagi cho‘qqiga ko‘tarildi. Bu haqda O‘zA xabar bermoqda.
Qayd etilishicha, cho‘qqiga ko‘tarilish tajribali alpinistlar tomonidan ko‘p oylik tayyorgarlik va bir haftalik ekspedisiya natijasida amalga oshirilgan.
Toqqa ko‘tarilish shimoli-g‘arbiy tomondan amalga oshirilib, u murakkabligi jihatidan 4 "A" toifaga ega. Mamlakat bayrog‘i bilan birga cho‘qqiga ko‘tarilgan alpinistlar ushbu voqeani prezident Shavkat Mirziyoyevning tavallud kuniga bag‘ishlagan.
"Alpinistlar mamlakatda sodir bo‘layotgan keng ko‘lamli islohotlar va ijobiy o‘zgarishlarni aks ettirishini nazarda tutgan holda ushbu cho‘qqiga “Yangi O‘zbekiston” nomini berishni taklif qildi", - deyiladi xabarda.
