Toshkent aeroportida valyutani noqonuniy olib o‘tmoqchi bo‘lishdi
Hozirda surishtiruv harakatlari olib borilmoqda.
Toshkent xalqaro aeroportida xorij fuqarolari 14 000 AQSH dollarini noqonuniy olib o‘tmoqchi bo‘ldi. Bu haqida “Toshkent-AERO” IBK axborot xizmati maʼlum qildi.
Qayd etilishicha, 25 iyul kuni soat 18:40 larda Toshkent — Almata yo‘nalishi bo‘yicha uchib ketayotgan chet el fuqarosiga tegishli 1 dona qora rangli hamyon tegishli tartibda ko‘zdan kechirilgan. Hamyon ichidan bojxona nazoratiga belgilangan tartibda taqdim etilmagan, og‘zaki so‘rovda maʼlum qilinmagan, olib chiqish meʼyoridan ortiq bo‘lgan 7100 AQSH dollari borligi aniqlangan.
Shuningdek, xuddi shu reys bilan uchib ketayotgan xorij fuqarosining qora rangli hamyoni hamda shimining cho‘ntagidan bojxona nazoratiga belgilangan tartibda taqdim etilmagan, og‘zaki so‘rovda aytilmagan, olib chiqish meʼyoridan ortiq bo‘lgan 7100 AQSH dollari borligi aniqlangan.
Hozirda ushbu holatlar yuzasidan surishtiruv harakatlari olib borilmoqda.
