Namanganda ikki kishi bank kassirini 3-qavatdan tashlab yubordi
Ular avtomashinada voqea joyidan noma’lum tomonga qochib ketib, yashiringan.
Namangan viloyatida ikki nafar xaridor bank xodimini qasddan 3-qavatdan itarib yubordi. Bu haqda Bosh prokuratura matbuot kotibi Hayot Shamsutdinov ma’lum qildi.
Qayd etilishicha, Namangan shahridagi “Obihayot” MFY Ibrat ko‘chasida ijara asosida istiqomat qiluvchi 22 yoshli X.M. va uning tanishi N.L. 21 yoshli bank kassiri M. A. bilan o‘zaro tortishgan. Ular bank kassirini qasddan o‘ldirish maqsadida uni qo‘p qavatli xonadonning yotoqxona oynasi romiga majburlab chiqarib, 3-qavatdan pastga itarib yuborgan.
Shundan so‘ng ular yashirinish maqsadida avtomashinada voqea joyidan noma’lum tomonga qochib ketib, yashiringan.
Jabrlanuvchiga voqea sodir bo‘lgan vaqtda xonadonning hovlisida bo‘lgan fuqarolar tomonidan yordam ko‘rsatilib, u shoshilinch tez yordam ilmiy markazining Namangan filialiga olib borilgan. Shifokorlarning dastlabki ma’lumotnomasida, fuqaro M.A. jarohatlar og‘irlik darajasiga ko‘ra “hayot uchun xavfli bo‘lgan og‘ir tan jarohati” guruhiga kirishi ko‘rsatilgan.
Mazkur holat yuzasidan Jinoyat kodeksining 25-(Jinoyatga tayyorgarlik ko‘rish va jinoyat sodir etishga suiqasd qilish), 97-moddasi (Qasddan odam o‘ldirish) 2-qismi “p” bandi bilan jinoyat ishi qo‘zg‘atilgan. Hozirda jinoyatni sodir etgan shaxslar Jinoiy-prosessual kodeksining 221-moddasi tartibida ushlangan.
