Islom sivilizatsiyasi markaziga 6 ta tarixiy kitob topshirildi

Vazirlar Mahkamasi huzuridagi O‘zbekistondagi Islom sivilizatsiyasi markazi kutubxonasi yangi qo‘lyozma va toshbosma asarlar bilan boyidi. Markaz direktori, sanʼatshunoslik fanlari bo‘yicha falsafa doktori Firdavs Abduxoliqov mazkur kutubxonaning nodir qo‘lyozmalar fondiga o‘z kolleksiyasida saqlanayotgan oltita tarixiy manbani hadya qildi.

 

O‘zbekistondagi Islom sivilizatsiyasi markazi ilmiy xodimi Azimjon G‘ofurovning taʼkidlashicha, shundan 3 tasi qo‘lyozma va 3 tasi toshbosma asarlar bo‘lib, ularning barchasi to‘liq, yaxshi saqlangan, eʼtiborga molik asarlardan. 

 

Shulardan biri, Faxriddin Ali ibn Husayn al-Koshifiy Safiyning “Rashahot aynul hayot” asari. Bu asar xalq tilida “Rashahot al-uyun” nomi bilan mashhur bo‘lgan. Asarda islom olamida mashhur bo‘lgan tasavvuf tariqasidagi avliyo zotlarning tarjimai hollari, ular bilan sodir bo‘lgan voqealar yozilgan. Asar 1151/1738 yil xattot Muhammad Saloh ibn al-Mabrur Abdushukur tomonidan ko‘chirilgan. 

 

 

Sharʼiy masaladlarga oid “Muxtasar viqoya maʼa jo‘ng” asari ham bor. Asarga qozi tomonidan masalalarga mos hayotiy voqeotlar yozilgan. U arab-fors tillarida bo‘lib, 1236/1820 yil ko‘chirilgan.

 

 

Shuningdek, hadya qilingan manbalar – O‘zbekistondagi Islom sivilizatsiyasi markazi fondiga taqdim qilingan asarlar orasida meros ilmiga oid “Faroiz” asari sharhi, madrasalarda darslik sifatida o‘tilgan “Talimul mutaallim”, “Munʼyatul-musolliy”, “Tajvid” asari qo‘lyozmalari, Imom al-Buxoriyning 1893 yilda Misrda nashr qilingan “Al-Jomiʼ as-sahih” to‘plami, tibbiyotga oid “Mezon-ut-tibb” asarining 1894 yilda bosilgan toshbosma nusxasi, Evklidning (tax. mil.avv. 325-265 yillarda yashagan qadimgi yunon matematigi, geometrigi) 1910 yil arab tilida chop etilgan “Usul al-handasa val hisob li-Iqlidis” asarlari ham bor.