Namanganda o‘qituvchilar maktabda o‘t-o‘lan yulishga majburlandi
Holat yuzasidan rasmiy munosabat bildirildi.
Avvalroq Namangan viloyati Pop tumani 43-maktab direktori maktabda taʼtil bo‘lishiga qaramay, pedagoglarni taʼlim maskaniga chaqirib, soat 16:00 gacha o‘zlariga tegishli bo‘lmagan vazifalarni bajarishga, yaʼni maktab hududidagi o‘t-o‘lan, beda va ajriqlarni yulishga majbur qilgani haqida xabar berilgandi.
Viloyat Maktabgacha va maktab taʼlimi boshqarmasining maʼlum qilishicha, hozirda ushbu direktor jarimaga tortilgan.
Direktorga nisbatan Maʼmuriy javobgarlik to‘g‘risidagi kodeksining 51- moddasi (Mehnatga maʼmuriy tarzda majburlash) 1-qismiga asosan bazaviy hisoblash miqdorining 50 baravari miqdorida jarima jazosi qo‘llangan.
Eslatib o‘tamiz, pedagog xodimlarning xizmat vazifalarini bajarishiga to‘sqinlik qilganlik uchun javobgarlikni kuchaytirishni ko‘zda tutuvchi qonunga ko‘ra, ️huquqbuzarlik taʼlim tashkilotining pedagog xodimiga nisbatan sodir etilgan bo‘lsa, bazaviy hisoblash miqdorining 100 baravaridan 150 baravarigacha miqdorda jarima solishga sabab bo‘ladi.
