“Andijon” klubi futbolchisi Milliy gvardiya xodimini urdi
Holat yuzasidan rasmiy munosabat bildirildi.
Ijtimoiy tarmoqda Toshkentdagi “Bunyodkor” stadionida “Andijon” klubi futbolchisi va Milliy gvardiya xodimlari o‘rtasida mojaro yuzaga kelgani aks etgan video tarqaldi.
Maʼlumotlarga ko‘ra, 11 avgust kuni “Bunyodkor” stadionida “Bunyodkor” - “Andijon” jamoalari o‘rtasida futbol uchrashuvi bo‘lib o‘tgan.
“Andijon” klubi aʼzosi Marlen Chobanov stadionning VIP bo‘limida o‘yinni tomosha qilgan. Uchrashuv yakunlanganidan so‘ng, soat 22:05 da futbolchi VIP bo‘limi orqali ichkariga kirishga uringan. Maxsus ruxsatnomaga (beydjik) ega bo‘lmagan futbolchidan Milliy gvardiya harbiy xizmatchisi uning qayerga ketayotganligini, chiqish uchun boshqa yo‘lakdan foydalanishi zarurligini aytgan. Ammo futbolchi Marlen Chobanov harbiy xizmatchining qonuniy talablariga bo‘ysunmasdan, xizmat faoliyatiga qarshilik ko‘rsatib, uning yuz qismiga qo‘li bilan bir marotaba urib, unga tan jarohati yetkazgan.
Hozirda mazkur holat yuzasidan Chilonzor tumani prokuraturasi tomonidan JKning 219-moddasi 2-qismi bilan jinoyat ishi qo‘zg‘atilib, dastlabki tergov harakatlari olib borilmoqda.
